کلر سیداں (نامہ نگار) — تحصیل کلر سیداں میں جرائم پیشہ عناصر ایک بار پھر سرگرم ہو گئے۔ گزشتہ شب دھان گلی روڈ پر مسلح ڈاکوؤں نے خطرناک انداز میں واردات کی کوشش کی۔ ڈاکوؤں نے سڑک پر پتھر رکھ کر ناکہ بندی کی اور گاڑی روکنے کی کوشش کی، تاہم گاڑی نہ رکنے پر ڈاکوؤں نے فائرنگ کر دی، جس کے نتیجے میں ایک مسافر معمولی زخمی ہو گیا۔ واردات کے فوراً بعد ڈاکو موقع سے فرار ہو گئے۔
ذرائع کے مطابق، واقعہ رات کے وقت اس وقت پیش آیا جب شاہ خاکی سے تعلق رکھنے والے ایک خاندان کا فرد، جو بیرون ملک جانا چاہتا تھا، اپنی پرواز کی منسوخی کے باعث واپس گھر جا رہا تھا۔ جب ان کی گاڑی دھان گلی روڈ سے گزر رہی تھی تو اچانک سڑک پر بڑے پتھر نظر آئے جنہیں ڈاکوؤں نے بطور رکاوٹ رکھا ہوا تھا تاکہ گاڑی روکی جا سکے۔
ڈرائیور نے صورتِ حال کو بھانپتے ہوئے حاضر دماغی کا مظاہرہ کیا اور گاڑی روکنے کے بجائے تیزی سے آگے بڑھا دی۔ اس پر مسلح ڈاکوؤں نے گاڑی پر فائرنگ کر دی، جس سے گاڑی میں سوار ایک شخص کو معمولی زخم آئے۔ خوش قسمتی سے کوئی جانی نقصان نہیں ہوا، تاہم مسافروں کو شدید ذہنی صدمہ پہنچا۔
واقعہ کی اطلاع فوری طور پر پولیس ہیلپ لائن 15 پر دی گئی جس پر ایس ایچ او کلر سیداں اپنی نفری کے ہمراہ موقع پر پہنچے۔ پولیس نے جائے وقوعہ کو گھیرے میں لے کر سرچ آپریشن کا آغاز کیا۔ ڈاکوؤں کی تلاش کے لیے قریبی علاقوں میں ناکہ بندی بھی کی گئی تاکہ ملزمان کو جلد از جلد گرفتار کیا جا سکے۔
ذرائع کے مطابق، پنجاب ہائی وے پٹرولنگ پولیس کا گشت نظام اس وقت مکمل طور پر غیر فعال تھا اور گشت پر مامور عملہ موقع پر موجود نہ تھا، جس پر شہریوں نے سخت تشویش اور غم و غصے کا اظہار کیا ہے۔ شہریوں کا کہنا ہے کہ ہائی وے پٹرولنگ پولیس کا کردار صرف کاغذوں تک محدود ہو چکا ہے اور عملی طور پر شاہراہوں پر عوام کی حفاظت کو یقینی بنانے میں ناکام ہے۔
ایس ایچ او کلر سیداں کا کہنا ہے کہ پولیس نے مقدمہ درج کر لیا ہے اور جدید طریقۂ تفتیش کے ذریعے جلد ہی ملزمان کو گرفتار کر کے قانون کے کٹہرے میں لایا جائے گا۔ انہوں نے مزید کہا کہ عوام کو ایسے عناصر کے خلاف فوری اطلاع دینے کی ترغیب دی جا رہی ہے تاکہ پولیس بروقت کارروائی کر سکے۔
واضح رہے کہ دھان گلی روڈ اس علاقے کی اہم سڑکوں میں شمار ہوتی ہے، جہاں سے روزانہ درجنوں گاڑیاں گزرتی ہیں۔ اس سڑک پر جرائم پیشہ افراد کی موجودگی اور پولیس کی غیر حاضری مستقبل میں مزید سنگین واقعات کا پیش خیمہ بن سکتی ہے، جس پر متعلقہ حکام کو فوری توجہ دینے کی ضرورت ہے۔
