کلرسیداں تا راجہ بازار اے سی بس سروس عوام کے لیے عذاب بن گئی

کلرسیداں (نمائندہ پنڈی پوسٹ) کلرسیداں تا راجہ بازار اے سی بس سروس عوام کے لیے عذاب بن گئی۔مسافروں سے بدتمیزی، اوورلوڈنگ اور شکایات پر عدم کارروائی، شہری سراپا احتجاج۔تفصیلات کے مطابق کلرسیداں اور گردونواح کے رہائشیوں نے راجہ بازار تک چلنے والی اے سی بس سروس کو سخت تنقید کا نشانہ بنایا ہے۔

عوام کا کہنا ہے کہ جس سروس کو شہریوں کو آرام دہ اور باوقار سفر فراہم کرنے کے لیے شروع کیا گیا تھا، وہ اب شہریوں کے لیے وبال جان بن چکی ہے۔روزانہ سینکڑوں مسافر اس سروس کے ذریعے سفر کرتے ہیں مگر عملے کی جانب سے بدتمیزی اور مسافروں کو اوورلوڈ کرنا معمول بن چکا ہے۔

مسافروں کا کہنا ہے کہ بسوں میں لوگوں کو بھیڑ بکریوں کی طرح ٹھونس دیا جاتا ہے، جس سے نہ صرف سفر اذیت ناک ہو جاتا ہے بلکہ حادثات کا خدشہ بھی بڑھ گیا ہے۔شہریوں کے مطابق بارہا شکایات کے باوجود متعلقہ حکام خاموش تماشائی بنے ہوئے ہیں اور کسی قسم کی اصلاحی کارروائی عمل میں نہیں لائی جا رہی۔

کئی مسافروں نے دعویٰ کیا کہ عملے کا رویہ انتہائی ناگوار ہے اور عزت نفس مجروح کرنے میں وہ کوئی کسر نہیں چھوڑتے۔کلرسیداں اور گردونواح کے رہائشیوں نے وزیراعلیٰ پنجاب اور چیف ٹریفک آفیسر راولپنڈی سے فوری نوٹس لینے، بدتمیزی اور اوورلوڈنگ کے خلاف سخت کارروائی کرنے اور مسافروں کو باوقار اور محفوظ سفر فراہم کرنے کا مطالبہ کیا ہے۔