ڈیجیٹل پاکستان اور PUJکا پانی کے تحفظ کیلئے مشترکہ اقدام کا فیصلہ

اسلام آباد (نمائندہ خصوصی)کونسل برائے تحفظ آب، ڈیجیٹل پاکستان اور پوٹھوہار یونین آف جرنلسٹس (PUJ) نے پانی کے تحفظ کے لیے مشترکہ طور پر آگے بڑھنے کا عزم ظاہر کیا ہے۔ اس حوالے سے اسلام آباد میں ایک اہم اجلاس منعقد ہوا جس میں ڈیجیٹل ماہرین، میڈیا پروفیشنلز اور دونوں اداروں کے ایگزیکٹوز نے شرکت کی۔

اجلاس میں پانی کے بڑھتے ہوئے بحران پر تشویش کا اظہار کرتے ہوئے اتفاق کیا گیا کہ پانی کے وسائل کے بہتر انتظام، بچت اور پائیدار استعمال کو یقینی بنانے کے لیے مربوط اقدامات ناگزیر ہیں۔ شرکاء نے اس بات پر زور دیا کہ عوام میں آگاہی پیدا کرنے، تعلیم دینے اور پانی کے مؤثر استعمال کو فروغ دینے کے لیے فوری عملی مہمات شروع کی جائیں۔

پوٹھوہار یونین آف جرنلسٹ کی طرف سے چیئرمین ڈاکٹر عتیق فرہاد، جنرل سیکرٹری راجہ طاہر محمود، سیکرٹری انفارمیشن راجہ نوید حسین، مظہر، رجب علی، مدثر اور دیگر نے شرکت کی اس موقع پر میڈیا کے کردار کو بھی اجاگر کیا گیا اور کہا گیا کہ صحافی برادری کے ذریعے پانی کے بحران پر قومی سطح پر شعور اجاگر کیا جا سکتا ہے۔ اجلاس کے اختتام پر کونسل برائے تحفظ آب کی جانب سے پوٹھوہار یونین آف جرنلسٹس کے عہدیداران کو اعزازی بیجز بھی پیش کیے گئے۔