پی ٹی آئی احتجاج،راولپنڈی اسلام آباد کے تمام راستے سیل

روات (نمائندہ پنڈی پوسٹ)پی ٹی آئی کے کل کے احتجاج کے پیشِ نظر فیض آباد پُل سے اسلام آباد آنے اور جانے والے راستے آج بند کر دیے گئے۔روات ٹی کراس پر کنٹینرز لگا کر اسلام آباد میں داخلے اور زیرو پوائنٹ پُل کے نیچے کنٹینرز کھڑے کر دیےگئے ہیں اور وفاقی دارالحکومت میں میٹرو بس سروس بھی معطل کر دی گئی ہے۔

اسلام آباد اور لاہور میں موٹر ویز کے تمام انٹری پوائنٹس بھی بند ہیں، لاہور سے اسلام آباد جانے والے راستے ٹھوکر نیاز بیگ، بابو صابو انٹرچینج، سگیاں پُل اور شاہدرہ چوک بھی بند ہیں، رنگ روڈ کو بھی 2 دن کے لیے بند کر دیا گیا ہےعلاوہ ازیں پنجاب کے بیشتر شہروں میں دوسرے شہروں کو جانے والی بسوں کے اڈے بھی بند کردیے گئے ہیں۔

راستوں کی بندش کے باعث شہری مشکلات کا شکار ہیں۔ذرائع کے مطابق اسلام آباد کے تمام داخلی راستے رات 12 بجے مکمل بند کر دیے گئے تھے اور شہر کے داخلی راستوں پر انتظامیہ اور پولیس نفری کی تعیناتی کا عمل جاری ہے۔واضح رہے کہ کل 24 نومبر کو پی ٹی آئی نے اسلام آباد میں احتجاج کا اعلان کر رکھا ہے۔