پی او ایف کے شہداء قوم کا فخر ہیں، ان کی قربانیوں کو فراموش نہیں کیا جا سکتا: سابق وفاقی وزیر غلام سرور خان

ٹیکسلا۔ سابق وفاقی وزیر غلام سرور خان نے کہا ہے کہ پی او ایف کے شہداء قوم کا فخر ہیں، جن کی قربانیوں کو کبھی فراموش نہیں کیا جا سکتا،ان کے دورِ وزارت میں شہداء کے لیے تیار کیے گئے فلیٹس تاخیر کا شکار ہیں، جنہیں فوری طور پر اہل خانہ میں تقسیم کیا جائے تاکہ متاثرہ خاندان حقیقی ریلیف حاصل کر سکیں،ان خیالات کا اظہار انہوں نے سابق چیئرمین یونین کونسل عثمان کھٹڑ ملک ایاز، سابق کونسلر ملک اظہر نواز، سابق کونسلر ادریس خان،ماہر تعلیم عطاء الرحمان چوہدری اور سابق جنرل سیکرٹری ورکمین ایسوسی ایشن محمود الحسن کے ہمراہ میڈیا سے گفتگو کے دوران کیا۔

غلام سرور خان نے مزید کہا کہ مزدوروں کے واجب الادا بونس مزید تاخیر کے بغیر تمام ملازمین کو ان کے سکیل کے مطابق ادا کیے جائیں۔ انہوں نے کہا کہ 21 اگست 2008 کے سانحہ اور 12 اگست 2021 کے سانحہ ایکسپلوزو فیکٹری کے شہداء کے ورثاء تاحال حکومتی امداد اور وعدوں کے منتظر ہیں، جو انتہائی افسوسناک ہے۔

ان کا کہنا تھا کہ شہداء کے ورثاء اور مزدور طبقے کے مسائل حل کرنا حکومت اور پی او ایف انتظامیہ کی بنیادی ذمہ داری ہے تاکہ انصاف کے تقاضے پورے ہوں اور عظیم قربانیوں کا عملی اعتراف ہو سکے۔