پنجاب کی ترقی سے جلنے والے دماغوں کی صفائی کر رہی ہوں،مریم نواز

لاہور(پنڈی پوسٹ نیوز )وزیراعلیٰ پنجاب مریم نواز نے کہا ہے کہ کچھ لوگ پنجاب کی ترقی سے جلتے ہیں،اس وقت پنجاب میں  صفائی اور ترقی کا انقلاب آچکا جبکہ صوبے سے نہ صرف جرائم کی صفائی کردی بلکہ ان دماغوں کی بھی صفائی کررہی ہوں جو پنجاب کی ترقی سے جلتے ہیں، پنجاب کی بات میں نہیں کروں گی تو کون کرے گا، تعلیم، صحت، صفائی، سڑکوں کی بحالی اور سواری عوام کے بنیادی حق ہیں ۔ان خیالات کا اظہار انہوں نے گزشتہ روز یہاں ستھرا پنجاب پروگرام کی تقریب سے خطاب کرتے ہوئے کیا۔اس موقع انہوں نے ‘‘سچا ہوا خواب ۔یہ ہے ستھرا پنجاب ’’،15کروڑ لوگوں کیلئے دنیا کے سب سے بڑے سالڈ ویسٹ مینجمنٹ پروگرام کا آغازکردیا۔وزیراعلیٰ پنجاب نے ڈسٹرکٹ کیلئے نیو سینی ٹیشن فلیٹ کا افتتاح کردیا جبکہ پنجاب کے اضلاع کیلئے 700 جدید ترین ویسٹ مینجمنٹ گاڑیاں اور مشینیں فراہم کر دیں ، انہوں نے ستھرا پنجاب بک کی رونمائی،ستھرا پنجاب ویب سائٹ کی لانچنگ بھی کی اورسینی ٹیشن فلیٹ کی چابیاں چیف سیکرٹری اور کمشنرز کے سپرد کر دیں ۔ وزیراعلیٰ نے ستھرا پنجاب پروگرام کے ڈیڑھ لاکھ ملازمین کو راشن کارڈ دینے کا بھی اعلان کردیا۔

اس موقع پر خطاب میں مریم نواز نے مزید کہا کہ ستھرا پنجاب کے ہیروز کو سلام پیش کرتی ہوں ، ستھرا پنجاب پروگرام کی جیکٹ پہننا میرے لئے قابل فخر ہے ، اگر پولیس کی وردی پہن سکتی ہوں تو ستھرا پنجاب کی کیوں نہیں؟، ستھرا پنجاب کی ٹیم نے صوبے کے چپے چپے کو صاف کیا ، میرا سر فخر سے بلند ہے ، پنجاب بھرمیں صفائی پروگرام کامیابی سے جاری ہے ۔مریم نواز نے مزید کہا کہ شہباز شریف کی حکومت ختم ہوتے ہی صفائی کا نظام بھی ختم ہوگیا،گوگی پنکی کے دور میں صفائی کا کوئی نظام نہیں تھا، گوگی، پنکی کے دورمیں پنجاب میں تباہی آئی، تبدیلی کے دعویداروں کے دور میں ہر طرف گندگی کے ڈھیر تھے ، آج ستھرا پنجاب کی ٹیم میں ڈیڑھ لاکھ کی فورس ہے ، پہلے پنجاب کے دیہاتوں میں کسی نے توجہ نہیں دی تھی، اب پنجاب کے ہر دیہات میں صفائی ہو رہی ہے ، بیٹیاں آتی ہیں تو گھروں کی صفائی کرتی اور گھروں کو سجاتی ہیں۔

مریم نواز نے کہا کہ وزیراعظم شہبازشریف کہتے تھے کہ مریم نواز اتنے بڑے صوبے کو کیسے سنبھالے گی لیکن آج شہبازشریف مجھے ملتے ہیں تو کارکردگی دیکھ کر شاباش دیتے ہیں ۔پولیس، کمشنرز، ڈپٹی کمشنرز سب انتظامیہ میری فورس کا حصہ ہیں