ٹیکسلا پریس کلب کی جانب سے صحافیوں پر تشدد کے خلاف مظاہرہ

ٹیکسلا۔ ٹیکسلا پریس کلب کی جانب سے نیشنل پریس کلب اسلام آباد پر پولیس کے دھاوے اور صحافیوں پر تشدد کے خلاف مظاہرہ کیا گیا اس موقع پر شدید نعرے بازی کی گئی۔

مظاہرے سے نگران صدر ٹیکسلا پریس کلب حسن علی طاہر، جنرل سیکرٹری بابو وسیم شاہ ودیگر عہدیداروں نے خطاب کرتے ہوئے کہا کہ نیشنل پریس کلب صحافیوں کا دوسرا گھر ہے، وہاں پولیس کی جانب سے دھاوا بولنا، کیمرہ مینوں اور دیگر صحافیوں کے ساتھ بدتمیزی اور تشدد کرنا، جبکہ کیفے ٹیریا میں توڑ پھوڑ کرنا کسی طور قابل قبول نہیں۔

انہوں نے کہا کہ یہ اقدام نہ صرف آزادی صحافت پر حملہ ہے بلکہ صحافی برادری کو دبانے کی مذموم کوشش ہے۔ اس واقعے کی جتنی مذمت کی جائے کم ہے۔

مقررین نے کہا کہ قائد صحافت افضل بٹ کی ایک کال پر ٹیکسلا پریس کلب کا ہر ممبر حاضر ہے۔ مقررین نے اس عزم کا اعادہ کیا کہ قائد صحافت افضل بٹ نے جو لائحہ عمل احتجاج کے لئے واضح کیا ہم اپنے قائد صحافت کی ہر کال پر لبیک کہتے ہوۓ ان کے شانہ بشانہ کھڑے ہوں گے۔

مقررین نے وزیر داخلہ سے مطالبہ کیا ہے کہ واقعہ کا فوری نوٹس لیتے ہوئے ذمہ دار اہلکاروں کو گرفتار کیا جائے اور ان کے خلاف سخت قانونی کارروائی عمل میں لائی جائے تاکہ آئندہ اس طرح کے واقعات کو روکا جا سکے