راولپنڈی(کرائم رپورٹر )سوشل میڈیا پر وائرل ہونے والی ایک نئی ویڈیو نے پنجاب پولیس کے سوشل میڈیا ضابطہ اخلاق پر کئی سوالات کھڑے کر دیے ہیں،معروف ٹک ٹاکر ’’پنڈی گرل‘‘ نے حالیہ دنوں میں ٹریفک پولیس راولپنڈی کی گاڑی اور لیڈی وارڈن کے ساتھ ایک ویڈیو بنائی ہے
یہ ویڈیو سوشل میڈیا پر وائرل ہونے کے بعد عوامی حلقوں میں شدید تنقید کی جا رہی ہے۔صارفین کا کہنا ہے کہ اگر سادہ وردی میں پولیس اہلکار سوشل میڈیا پر ویڈیو بنائے تو اس کے خلاف کارروائی کی جاتی ہے،مگر یہاں نہ صرف ایک عام ٹک ٹاکر نے پولیس کی سرکاری گاڑی کو استعمال کیا،بلکہ اس ٹک ٹاک ویڈیو میں ڈیوٹی پر مامور لیڈی وارڈن بھی شامل دکھائی دے رہی ہیں
عوامی سوال یہ ہے کہ کیا ٹک ٹاکر کو پولیس کے سرکاری وسائل استعمال کرنے کی اجازت کس نے دی؟کیا یہ ’سہولت‘ کسی مخصوص تعلق یا منظوری کا نتیجہ ہے؟ اور اگر ایسا نہیں تو پھر حکومتی احکامات کی خلاف ورزی پر ذمہ دار اہلکاروں کے خلاف کارروائی کیوں نہیں ہو رہی؟
پولیس ترجمان یا راولپنڈی ٹریفک پولیس کی جانب سے تاحال کوئی موقف سامنے نہیں آیا،مگر عوامی دباؤ بڑھتا جا رہا ہے کہ اس واقعے کی مکمل انکوائری کی جائے،اور ذمہ داران کو قانون کے کٹہرے میں لایا جائے
