وزیراعظم کی زیرِ صدارت وفاقی کابینہ کا اجلاس: آرمی، نیوی اور ایئرفورس ایکٹس میں ترامیم کی منظوری

اسلام آباد: وزیراعظم محمد شہباز شریف کی زیرِ صدارت وفاقی کابینہ کے اہم اجلاس میں دفاعی قوانین کو ستائیسویں آئینی ترمیم سے ہم آہنگ کرنے کے لیے بڑے فیصلے کیے گئے۔ اجلاس میں پاکستان آرمی ایکٹ، پاکستان ایئر فورس ایکٹ اور پاکستان نیوی ایکٹ میں اہم ترامیم کی منظوری دے دی گئی۔ترمیم شدہ قوانین میں آئین کے آرٹیکل 243 کے تحت کی جانے والی تبدیلیوں کی روشنی میں چیف آف ڈیفنس فورسز کے عہدے کی مدت سمیت متعدد امور کو قانونی شکل دی گئی ہے۔ حکومت کے مطابق یہ ترامیم جدید، ہم عصر اور مستقبل کی جنگی ضروریات کو سامنے رکھتے ہوئے تیار کی گئی ہیں تاکہ دفاعی ادارے نئی عالمی سیکیورٹی تقاضوں سے ہم آہنگ ہو سکیں۔مزید برآں وفاقی کابینہ نے اقتصادی رابطہ کمیٹی (ECC) کے 7 نومبر 2025 کے اجلاس میں کیے گئے فیصلوں کی بھی توثیق کر دی، جس کے بعد وہ فیصلے باضابطہ طور پر نافذالعمل ہو جائیں گے۔