وزیر اعلیٰ پنجاب کے احکامات نظر انداز،گوندل منڈی میں تندور مالکان نے روٹی کے من مانے نرخ مقرر کر لیے

اٹک (نمائندہ پنڈی پوسٹ) وزیر اعلیٰ پنجاب مریم نواز شریف کے احکامات کو نظر انداز کر تے ہوئے ضلع اٹک کے بین الصوبائی سرحدی تجارتی مرکز گوندل منڈی میں تندور مالکان نے روٹی کے خودساختہ اور من مانے نرخ وصول کرنے شروع کر دیے ۔ گوندل منڈی کے نواحی علاقے مدروٹہ کے معروف سماجی شخصیت سابق پرائیس کنٹرول مجسٹریٹ و نائب تحصیلدار ملک عبد الرشید نے میڈیا کو بتایا کہ گوندل منڈی کی مارکیٹ میں قائم تندور مالکان 120 گرام روٹی اور نان کے مقررہ نرخ 12 روپے کی بجائے 20 روپے وصول کر رہے ہیں ۔

جبکہ صارفین کے ذاتی آٹے کی پکی روٹی کے 10 روپے مقرر کر کے عوام کو لوٹ رہے ہیں ۔ انھوں نے مزید بتایا کہ گوندل منڈی صوبہ پنجاب اور خیبرپختونخوا کے بین الصوبائی سرحدی سنگم پر واقع مصروف ترین تجارتی مرکز ہے جس میں تاجروں نے سبزی، فروٹ، گوشت ، آٹا، گھی تیل، چاول، دال اور اشیائے خوردونوش کی غیر قانونی ذخیرہ اندوزی کے ساتھ ساتھ من مانے نرخ مقرر کر رکھے ہیں ۔ ناجائز منافع خور مافیا نے چیک اینڈ بیلنس کا نظام کو مفلوج کردیا ہے ۔ صارفین کی بڑھتی ہوئی شکایات پر اعلیٰ حکام کی ہدایات کے باوجود گوندل منڈی کی مارکیٹ میں پرائیس کنٹرول مجسٹریٹ نہیں آئے ۔سابق نائب تحصیلدار ملک عبد الرشید نے ڈپٹی کمشنر اٹک عاطف رضا سے عوامی مفادات کے پیش نظر فوری نوٹس لینے کا مطالبہ کیا ہے ۔