نوجوان اب کسی بہروپیے کے جھانسے میں نہیں آئیں گے: ملک عمر فاروق

ٹیکسلا۔ مسلم لیگ(ن) ضلع راولپنڈی کے صدر حاجی ملک عمر فاروق نے کہا ہے کہ جب بھی ملک ترقی کی راہ پر گامزن ہوتا ہے ملک دشمن عناصر حرکت میں آجاتے ہیں، نوجوان اب کسی بہروپیے کے جھانسے میں نہیں آئیں گے، جو بھی ملکی ترقی میں حائل ہوگا اس کے ساتھ ریاست سختی سے نپٹے گی، مسلم لیگ(ن) نے اپنے قائد میاں نوازشریف کی قیادت میں دنیا بھر کے اندر ملک کے نام اور وقار میں اضافہ کیا ہے،آج موجودہ حکومت نامساعد حالات کے باوجود نہ صرف ملکی دفاع کو مضبوط بنا رہی ہے بلکہ عوام کا معیار زندگی بلند کرنے کے لئے وفاقی اور پنجاب حکومت نے عوام دوست پروگرام شروع کر دئیے ہیں جن کے ثمرات عوام تک پہنچنا شروع ہو گئے ہیں، حلقہ کے اندر بلاتفریق اور بے لوث خدمت و تعمیروترقی کا عمل تیزی سے جاری ہے،ان خیالات کا اظہار انھوں نے پنڈ تربیلا نئی آبادی کو بجلی کی فراہمی کے منصوبے کے آغاز کے سلسلے میں منعقدہ میٹنگ سے خطاب کے دوران کیا

اس موقع پر نوجوان لیگی راہنما ملک ثاقب آف توتنیاں، حاجی بشیر، محمد ستار اعوان، محمد خان افسر، محمد نیاز،و دیگر عمائدین موجود تھے

حاجی ملک عمر فاروق نے کہا کہ حلقہ کے اندر عوام کی مشکلات کو مد نظر رکھتے ہوئے وفاقی وزیر مملکت بیرسٹر عقیل ملک نے عوامی مسائل حل کرنے کا جو سلسلہ شروع کر رکھا ہے وہ قابل تحسین ہے،ہم انشااللہ حلقہ کے عوام کو ان کی دہلیز پر سستے انصاف کی فراہمی اور انکے مسائل کو ترجیح بنیادوں پر حل کر رہے ہیں، پنڈ تربیلا والوں کے لئے ہمارے دروازے ہر وقت کھلے ہیں، موجودہ حکومت کی ترجیحات میں ملکی ترقی اور عوام کی خوشحالی ہے،مشکل وقت نکل چکا اب عوام نہ صرف خوشحال ہوں گے بلکہ مشکلات میں بھی واضح کمی آئے گی