میلے میں لگی دوکانوں پر دو گروپوں میں تصادم،متعدد زخمی

کلر سیداں (نمائندہ پنڈی پوسٹ)کلر سیداں کے نواحی علاقہ میں منعقدہ سالانہ میلے میں دو گروپوں کے درمیان لڑائی جھگڑے کے دوران زخمی ہونے والے نوجوانوں کو ٹی ایچ کیو ہسپتال کلر سیداں شفٹ کیا گیا جس کے بعد ہسپتال کا احاطہ میدان جنگ بن گیا جس پر ہسپتال انتظامیہ کو 15 پر کال کرنا پڑی جس کے نتیجے میں پولیس کی بھاری نفری ہسپتال پہنچ گئی۔تفصیلات کے مطابق درکالی شیرشاہی میں منعقدہ سالانہ میلے میں دکانیں لگانے پر جھگڑا ہو گیا جہاں دونوں طرف سے مجموعی طور پر پانچ افراد زخمی ہو کر ٹی ایچ کیو ہسپتال کلر سیداں پہنچ گئے جس کیساتھ ہی مضروب ہونے والے افراد کے رشتہ دار اور ساتھی بھی ہسپتال آ گئے جہاں ایک بار پھر دونوں گروپ ایک دوسرے کیساتھ گتم گتھا ہو گئے اور ہسپتال میدان جنگ بن گیا۔صورتحال کو دیکھتے ہوئے ایمرجنسی پر موجودہ میڈیکل آفیسر نے 15 پر کال کر دی جس کے فورابعد مقامی پولیس کی بھاری نفری بھی موقع پر پہنچ گئی۔