موسمیاتی ایمرجنسی: ضلع راولپنڈی میں ایک روزہ تعطیل کا اعلان

راولپنڈی (اسٹاف رپورٹر) – حالیہ شدید موسمی حالات اور ممکنہ سیلابی خطرات کے پیش نظر ڈپٹی کمشنر راولپنڈی نے ضلع بھر میں ایک روزہ عام تعطیل کا اعلان کر دیا ہے۔ اس فیصلے کا مقصد عوام کی جان و مال کا تحفظ اور کسی بھی ممکنہ حادثے سے بچاؤ ہے۔

نوٹیفکیشن جاری

ڈپٹی کمشنر راولپنڈی کی جانب سے جاری کردہ نوٹیفکیشن کے مطابق اج بروز جمعرات کو ضلع راولپنڈی کے تمام سرکاری و نجی تعلیمی ادارے، دفاتر اور کاروباری مراکز بند رہیں گے۔

نوٹیفکیشن میں کہا گیا ہے کہ “موسمیاتی خطرات اور نچلے علاقوں میں ممکنہ سیلابی صورتحال کے باعث احتیاطی تدابیر کے تحت یہ فیصلہ کیا گیا ہے۔”

شہریوں سے احتیاط برتنے کی اپیل

انتظامیہ کی جانب سے عوام الناس سے پرزور اپیل کی گئی ہے کہ وہ گھروں میں محدود رہیں، غیر ضروری طور پر باہر نکلنے سے گریز کریں اور کسی بھی ہنگامی صورتحال کی صورت میں ریسکیو 1122 یا متعلقہ اداروں سے فوری رابطہ کریں۔

متاثرہ علاقوں میں ریلیف آپریشن جاری

راولپنڈی کے کئی علاقوں میں پانی کی نکاسی، نالوں کی صفائی اور ریسکیو ٹیموں کی تعیناتی کا عمل جاری ہے۔ بالخصوص نشیبی علاقوں میں ریلیف آپریشن میں تیزی لائی جا رہی ہے تاکہ شہریوں کو کسی قسم کی دشواری کا سامنا نہ ہو۔

محکمہ موسمیات کی پیش گوئی

محکمہ موسمیات نے آئندہ 24 گھنٹوں میں مزید بارشوں کی پیش گوئی کی ہے، جس سے صورتحال مزید بگڑ سکتی ہے۔ ضلعی انتظامیہ مسلسل الرٹ ہے اور تمام اداروں کو ہائی الرٹ پر رکھا گیا ہے۔