ملکہ کوہسار مری نے سفید چادر اوڑھ لی

مری (نمائندہ پنڈی پوسٹ)ملکہ کوہسار مری میں پیر کی دوپہر کوموسم سرما کی پہلی تیز برفباری ہوئی ۔شام گئے تک مری میں 2 انچ جبکہ گلیات میں 3انچ برف پڑ چکی تھی جبکہ وقفے وقفے سے برفباری کاسلسلہ جاری تھا۔ملک بھر سے کثیر تعدادمیں آئے ہوئے سیاح برفباری شروع ہونے پر خوشی کااظہارکرتے رہے۔ ادھر ڈپٹی کمشنر مری آغاظہیر عباس شیرازی نے دیگرکے ہمراہ ضلعی انتظامیہ کی طرف سے بنائے گئے سہولیت سینٹرز کادورہ کیا ۔

دریں اثناءڈسٹرکٹ ایمرجنسی آفیسر ریسکیو1122 مری نے کہا ہے کہ برفباری کے آغازسے قبل ہی الرٹ جاری کردیا گیا جس کامقصد ہنگامی صورتحال پر بروقت قابو پانا ہے،انہوں نے کہا کہ 16 ایمرجنسی ایمبولینسز،6 فائر وہیکلز،2 ریسکیو وہیکلز، 20 ریسکیو بائیکس پر دو سو پچاس سے زائد ریسکیو 1122اہلکار اپنے فرائض سرانجام دے رہے ہیں۔مری انتظامیہ کی جانب سے مختلف شاہراہوں پر نمک کا چھڑکاؤ کیا گیا۔ ڈی سی مری آغا ظہیر عباس شیرازی نے کہا کہ سیاح مری آنے سے قبل موسمیاتی صورتحال سے آگاہی حاصل کریں۔