جب سے محترمہ مریم نواز نے وزارتِ اعلیٰ پنجاب کا منصب سنبھالا ہے، صوبے میں ترقی اور اصلاحات کا ایک نیا باب شروع ہوا ہے۔ ان کی قیادت میں پنجاب حکومت نے متعدد منصوبے اور پالیسیاں متعارف کروائی ہیں جن کا بنیادی مقصد صوبے کی ترقی، خوشحالی اور عوامی سہولتوں میں اضافہ ہے۔محترمہ مریم نواز کے فیصلے جہاں عوام میں مقبولیت حاصل کر رہے ہیں، وہیں بعض حلقوں کی جانب سے تنقید کا سامنا بھی ہے۔ تاہم مجموعی طور پر ان کی حکومت کو پنجاب کی تاریخ کی ایک متحرک اور فعال حکومت قرار دیا جا رہا ہے۔
حکومت پنجاب کی ترجیحات میں شہری انفراسٹرکچر کی بہتری سرفہرست ہے۔ ٹریفک نظام کو جدید خطوط پر استوار کرنے کے لیے انڈر پاسز، اوورہیڈ برج اور الیکٹرک بسوں کے منصوبے نمایاں ہیں۔ الیکٹرک بسوں کا اجرا عوام کے لیے سستا، آرام دہ اور ماحول دوست سفر فراہم کر رہا ہے، جب کہ حکومت کا اگلا ہدف پورے صوبے میں اس نظام کو وسعت دینا ہے۔
پنجاب حکومت نے امن و امان کی صورتحال بہتر بنانے کے لیے نئے ادارے بھی قائم کیے ہیں، جن میں پیرا فورس اور سی سی ڈی (کرائم کنٹرول ڈیپارٹمنٹ) قابلِ ذکر ہیں۔ اگرچہ ان اداروں پر کچھ تنقید بھی کی جا رہی ہے، لیکن ان کے قیام کے بعد صوبے میں جرائم کی شرح میں نمایاں کمی دیکھی گئی ہے۔
مذہبی حوالے سے مریم نواز حکومت کے بعض فیصلے عوامی سطح پر بحث کا باعث بنے ہیں۔ کچھ مذہبی حلقوں نے ان فیصلوں پر تنقید کی، مگر تجزیہ کاروں کے مطابق ان اقدامات کا مقصد مذہبی منافرت، انتہاپسندی اور انتشار کی سیاست کا خاتمہ کرنا ہے — وہ رجحانات جو گزشتہ برسوں میں خطرناک حد تک بڑھ چکے تھے۔
اگرچہ حکومت پر بعض سیاسی الزامات، جیسے فسطائیت اور انتخابی بے ضابطگیوں کے دعوے، بھی سامنے آئے ہیں، لیکن اس کے ساتھ یہ حقیقت بھی نظر انداز نہیں کی جا سکتی کہ مریم نواز کی حکومت نے پنجاب میں ترقی، تعمیر اور استحکام کے نئے امکانات پیدا کیے ہیں۔
بعض صحافتی اور سیاسی تجزیوں میں حکومت اور اسٹبلشمنٹ کے تعلقات پر قیاس آرائیاں کی جاتی ہیں، تاہم حکومتی ذرائع کے مطابق دونوں ادارے مکمل ہم آہنگی کے ساتھ صوبے اور ملک کی ترقی کے لیے مصروفِ عمل ہیں۔ یہی تعاون وہ بنیادی عنصر ہے جس کی بدولت آج پنجاب ترقی کے ایک نئے دور میں داخل ہو چکا ہے۔
میری دوسرے صوبوں سے بھی گزارش ہے کہ سیاسی یا نظریاتی اختلاف اپنی جگہ، مگر پنجاب حکومت خصوصاً محترمہ مریم نواز کی پالیسیوں سے سیکھنا چاہیے۔ مریم نواز پہلی بار وزیراعلیٰ بنی ہیں، لیکن سیاسی تجربے کی کمی کے باوجود انہوں نے نہایت قلیل عرصے میں جو ترقیاتی کام پنجاب میں کیے ہیں، وہ گزشتہ ستر سالوں میں مثال نہیں رکھتے۔
ان کی کارکردگی اس بات کا ثبوت ہے کہ نیک نیتی، وژن اور عوامی خدمت کے جذبے کے ساتھ اگر قیادت کی جائے تو قلیل مدت میں بھی بڑے نتائج حاصل کیے جا سکتے ہیں۔ دوسرے صوبوں کو چاہیے کہ وہ بھی ایسے اقدامات اپنے ہاں نافذ کریں تاکہ پورا ملک ترقی کی راہ پر گامزن ہو سکے۔پنجاب میں آج جو تعمیر و ترقی نظر آ رہی ہے، وہ اس بات کا ثبوت ہے کہ حکومت نے نہ صرف عوامی فلاح کے منصوبے شروع کیے بلکہ انہیں موثر انداز میں پایہ تکمیل تک پہنچایا۔
بہرام خان
