وزیراعلیٰ پنجاب مریم نواز شریف سے تبلیغی جماعت کے رہنماؤں کی ملاقات، رائے ونڈ اجتماع کے لیے خصوصی انتظامات کی ہدایت

وزیر اعلیٰ پنجاب مریم نواز الیکٹرو بس سروس، سڑکوں کی مرمت، خصوصی صفائی مہم اور عرقِ گلاب کے چھڑکاؤ کا اعلان — اکابرین تبلیغی جماعت کا مریم نواز کی عوامی خدمت کو خراجِ تحسین

لاہور (نمائندہ پنڈی پوسٹ حذیفہ اشرف) وزیراعلیٰ پنجاب مریم نواز شریف سے تبلیغی جماعت کے شوریٰ ارکان کی ملاقات ایوانِ وزیراعلیٰ لاہور میں ہوئی۔ ملاقات میں ڈاکٹر ندیم اشرف، مولانا امجد فاروق، مولانا محمد امیر، امتیاز احمد غنی اور ارشد شریک تھے۔وزیراعلیٰ نے رائے ونڈ اجتماع کے لیے تمام ممکنہ سہولتیں فراہم کرنے اور بہترین انتظامات کی ہدایت دی۔ انہوں نے ڈی سی، سی سی پی او، ڈی آئی جی اور سی ٹی او لاہور کو خود رائے ونڈ جا کر انتظامات کی نگرانی کی ہدایت کی۔مریم نواز شریف نے اجتماع کے شرکاء کی سہولت کے لیے ریلوے اسٹیشن اور ایئرپورٹ سے رائے ونڈ تک الیکٹرو بس سروس چلانے کا اعلان کیا، جو اجتماع کے اختتام تک جاری رہے گی۔۔

اس کے علاوہ وزیراعلیٰ نے رائے ونڈ کی تین سڑکوں کی فوری تعمیر و مرمت، پیچ ورک اور خصوصی صفائی مہم کا حکم دیا، جبکہ عرقِ گلاب کے چھڑکاؤ سے ماحول کو خوشگوار بنانے کی بھی ہدایت کی۔تبلیغی جماعت کے اکابرین نے الیکٹرو بس پراجیکٹ، صفائی مہم اور عوامی فلاحی منصوبوں پر مریم نواز شریف کو خراجِ تحسین پیش کیا۔ ان کا کہنا تھا کہ “پہلے بیرونِ ملک جاتے تھے تو کوئی بات نہیں سنتا تھا، اب عزت و احترام ملتا ہے — یہ مثبت تبدیلی ہے۔”وزیراعلیٰ مریم نواز شریف نے کہا کہ وہ “مخلوقِ خدا کی خدمت کو خالقِ کائنات کی عبادت سمجھ کر انجام دے رہی ہیں۔” انہوں نے کہا کہ “خدمت کا جذبہ خالص نیت سے ہے، اللہ تعالیٰ خود وسائل مہیا کرے گا۔”آخر میں وزیراعلیٰ نے مرکزِ رائے ونڈ کی دینی خدمات کو سراہا اور وفد سے ملک و قوم کی سلامتی اور سیلاب زدگان کے لیے خصوصی دعا کی درخواست کی