محلہ نیو ٹاؤن حسین آباد کے مکین سراپا احتجاج، نالے کی گندگی اور صفائی کے ناقص انتظامات پر شدید تشویش

کلرسیداں (یاسر ملک)
محلہ نیو ٹاؤن حسین آباد کے مکین سراپا احتجاج، نالے کی گندگی اور صفائی کے ناقص انتظامات پر شدید تشویش۔بارش میں نالے کا پانی گھروں میں داخل، گلیاں کیچڑ سے بھری، ڈسٹ بن کی عدم موجودگی سے صفائی کی صورتحال بدترین۔تفصیلات کے مطابق محلہ نیو ٹاؤن حسین آباد کے مکینوں نے علاقے میں صفائی کی انتہائی ابتر صورتحال پر ٹی ایم اے کلر سیداں سے فوری اقدامات کا مطالبہ کیا ہے۔ رہائشیوں کا کہنا ہے کہ ان کے محلے کے درمیان سے گزرنے والا برساتی نالہ گندگی سے بھر چکا ہے اور بارش کے دنوں میں اس کا پانی گلیوں اور گھروں میں داخل ہو جاتا ہے، جس سے روزمرہ زندگی مفلوج ہو کر رہ گئی ہے۔محلہ مکین عدنان طاہر، زاہد محمود، زوار حسین،مراد خان، خالد رشید، واحد حسین اور ولی خان،اظہر سمیت دیگر افراد نے مشترکہ بیان میں کہا کہ محلہ میں گلیوں کی صفائی باقاعدگی سے نہیں کی جاتی، نہ ہی یہاں کبھی کوئی ڈسٹ بن نصب کیا گیا ہے۔ ہماری آبادی سات سو سے زائد گھروں پر مشتمل ہے، مگر صفائی کے حوالے سے اسے مکمل طور پر نظر انداز کیا گیا ہے۔انہوں نے مزید بتایا کہ گزشتہ روز ٹی ایم اے کے عملے نے وزٹ کر کے واضح کیا کہ نالے کی صفائی ہاتھوں سے ممکن نہیں، اس کے لیے مشینری درکار ہے، مگر اس کے باوجود ابھی تک کوئی عملی اقدام نہیں کیا گیا۔مکینوں نے ٹی ایم اے کلر سیداں کے چیف آفیسر سے مطالبہ کیا ہے کہ فوری طور پر مشینی صفائی کروا کر نالے کو صاف کیا جائے، گلیوں میں روزانہ کی بنیاد پر صفائی کا عمل شروع کیا جائے اور علاقے میں مناسب تعداد میں ڈسٹ بن نصب کیے جائیں۔