فلسطینی عوام اور صمود فلوٹیلا کے شرکاء سے اظہار یکجہتی، جماعت اسلامی کا احتجاجی مظاہرہ

کلرسیداں (نمائندہ پنڈی پوسٹ) فلسطینی عوام اور صمود فلوٹیلا کے شرکاء سے اظہار یکجہتی، جماعت اسلامی کا احتجاجی مظاہرہ۔امیر جماعت اسلامی پاکستان حافظ نعیم الرحمن کی کال پر پورے ملک کی طرح کلرسیداں میں بھی فلسطینی عوام اور صمود فلوٹیلا کے شرکاء سے اظہار یکجہتی کے لیے احتجاجی مظاہرہ کیا گیا۔

مظاہرے کی قیادت امیر جماعت اسلامی کلرسیداں زون محمد توقیر اعوان نے کی۔شرکاء سے خطاب کرتے ہوئے محمد توقیر اعوان نے کہا کہ ہم بطورِ قوم اپنے فلسطینی بھائیوں کے دکھ، درد اور قربانیوں میں ان کے ساتھ ہیں۔ اسرائیل کی جانب سے صمود فلوٹیلا پر حملہ قابلِ مذمت اور ناقابلِ برداشت اقدام ہے۔انہوں نے مطالبہ کیا کہ حکومت پاکستان امت مسلمہ کی قیادت کرتے ہوئے اسرائیل اور امریکہ کے ساتھ ہر قسم کے تعلقات فوری طور پر منقطع کرے اور فلسطینی عوام کی ہر ممکن امداد کو یقینی بنائے۔ ساتھ ہی انہوں نے حکومت سے صمود فلوٹیلا کے گرفتار پاکستانیوں، خصوصاً سابق سینیٹر مشتاق احمد خان کی جلد رہائی کے لیے مؤثر اقدامات کرنے پر زور دیا۔

مظاہرے میں جماعت اسلامی کے کارکنان، مختلف سیاسی و سماجی شخصیات اور عام شہریوں کی بڑی تعداد نے شرکت کی۔ شرکاء نے ہاتھوں میں پلے کارڈز اور بینرز اٹھا رکھے تھے جن پر فلسطین سے اظہار یکجہتی اور اسرائیلی مظالم کے خلاف نعرے درج تھے۔شرکاء کا کہنا تھا کہ فلسطین کے عوام اپنی آزادی اور بقا کی جنگ لڑ رہے ہیں اور پوری امت مسلمہ کو ان کے شانہ بشانہ کھڑا ہونا چاہیے۔