راولپنڈی انسداد دہشت گردی کی خصوصی عدالت نے تحریک انصاف کے 26 نومبر کے پر تشدد احتجاج کے حوالے سے تھانہ صادق آباد میں درج مقدمہ میں ملزمان کے 68 ضامنوں کے وارنٹ گرفتاری کی عدم تعمیل پر سخت برہمی کا اظہار کرتے ہوئے ڈی ایس پی نیو ٹاؤن ایس ایچ او صادق آباد تفتیشی افسر اور تعمیلی افسر کو شوکاز نوٹس جاری کر دیا اور مقدمہ کی سماعت 16 اگست تک ملتوی کرتے ہوئے جواب طلب کرلیا ہے
گزشتہ روز سماعت کے موقع پر تھانہ صادق آباد کے مقدمہ نمبر 3393 میں نامزد کوئی بھی ملزم یا ان کا ضامن عدالت میں پیش نہ ہوا اس موقع پر پولیس کی جانب سے عدالت میں پیش کی گئی رپورٹ میں بتایا گیا کہ مقدمہ کے ملزمان اور ضامن روپوش ہیں دوران سماعت سپیشل پراسیکیوٹر ظہیر شاہ نے ضامنوں کیخلاف کاروائی اور مچلکوں کی ضبطگی کے لئے دائر درخواست میں موقف اختیار کیا کہ ملزمان ضمانت پر رہائی کے بعد غائب ضامن ملزمان کو پیش کرنے کے پابند ہیں
جبکہ 68 ملزمان کے وارنٹ گرفتاری پہلے ہی جاری ہو چکے ہیں جنہیں اشتہاری قرار دینے کی کاروائی بھی شروع ہے جس پر عدالت نے ملزمان کے 68 ضامنوں کی وارنٹ گرفتاری کی عدم تعمیل پر اظہار برہمی کرتے ہوئے ڈی ایس پی نیو ٹاؤن ایس ایچ او صادق آباد تفتیشی افسر اور تعمیلی افسر کو شوکاز نوٹس جاری کر دیا اور سماعت 16 اگست تک ملتوی کردی
