صوبیداراں نے باغ وچ پایا جانے آ لا اے کھوہ سوا صدی نی داستان سمیٹی بیٹھا۔ بروالہ گراں نا اے سب توں پرانا آرکیٹکچر آ ۔اے کھوہ انیسویں صدی نے آخر وچ گکھڑ خاندان نے فرزند بوستان خان کیانی تعمیر کروایا سا۔ تقریباً 50 فٹ ڈونگے اس کھوہ نے اندر گھڑے ہوئے بٹے بڑے خوبصورت انداز اچ لائے گے۔ کھو نے اوپر چکر ( رہٹ) لایا گیا چکر اس زمانے نی جدید ٹیکنالوجی سی۔ چکر دانداں اور کھوتیاں جوڑی تے چلایا جلنا سا۔ چکر نے اوپر لگے ڈبے جدوں کھو وچوں اوپر چڑھنے سے تے سوہنے میٹھے اور ٹھنڈے پانی نال بھرے ہونے سے۔ کھو نے نال اک خوبصورت باغ لایا سا نے جس وچ پٹنگ ، پھگواڑے، ہاڑیاں ، توت ، دھریکاں اور دیگر کافی سارے پھلدار اور غیر پھلدار بوٹے لائے سےنے جناں وچوں چند اک بوٹے اج وی موجود اے۔ باغ وچ ٹھپر، مولیاں گاجراں تراں ہدوانے اور کھکھڑیاں وی لانے سے۔ تقریباً اک صدی آباد رہن توں بعد اے باغ آہستہ آہستہ غیر آباد ہونا شروع ہوئی گیا۔ آج صرف باغ نا نام رہی گیا چند بوٹے اور صوبیداراں نا کھو اور زنگ آلود ڈبے اور چکر۔ او وقت وی کتنا خوبصورت ہویا ہوسی جس ویلے داند اس چکر کی گیڑنا ہوسی پانی نے ڈبے بھری بھری نکلنے ہوسن بوٹیاں
کی پانی لگنا ہوسی اور کھو اوپر میلہ لگنا ہوسی۔
تحریر محمد بلال
گاؤں بروالہ
یہ تحریر میں نے چند ماہ پہلے لکھی تھی لیکن پوسٹ نہیں کی تھی آج میں جب تحریر کو پوسٹ کر رہا ہوں
