صحافی عبدالعزیز پاشا کر گھر شارٹ سرکٹ سے آگ بھڑک اٹھی، لاکھوں روپے مالیت کا سامان اور نقدی جل کر راکھ

کلرسیداں (یاسر ملک)
کلرسیداں شارٹ سرکٹ سے آگ، لاکھوں روپے مالیت کا سامان اور نقدی جل کر راکھ۔کلرسیداں شہر میں شارٹ سرکٹ کے باعث مقامی صحافی عبدالعزیز عزیز کے گھر میں آگ بھڑک اٹھی جس نے ایک کمرے میں موجود قیمتی سامان کو اپنی لپیٹ میں لے لیا۔ واقعہ گزشتہ روز اس وقت پیش آیا جب اچانک بجلی کے شارٹ سرکٹ سے کمرے میں آگ لگ گئی۔آگ تیزی سے پھیلتے ہوئے کمرے میں موجود لاکھوں روپے مالیت کے سامان کو جلا گئی، جس میں گھریلو قیمتی اشیاء، فرنیچر، برقی آلات، دو لاکھ روپے نقدی اور انعامی بانڈز شامل تھے۔ ابتدائی اندازے کے مطابق متاثرہ خاندان کو تقریباً آٹھ لاکھ روپے کا مالی نقصان برداشت کرنا پڑا۔واقعہ کی اطلاع ملتے ہی ریسکیو 1122 کی ٹیم فوری طور پر جائے وقوعہ پر پہنچ گئی اور بروقت کارروائی کرتے ہوئے آگ کو دوسرے کمروں تک پھیلنے سے روک دیا، تاہم کمرہ مکمل طور پر جل کر خاکستر ہو گیا۔
عینی شاہدین کے مطابق آگ اتنی شدید تھی کہ قریبی گھروں کے مکین بھی خوفزدہ ہو گئے۔ اہل علاقہ اور ریسکیو اہلکاروں کی مشترکہ کوششوں سے آگ پر قابو پایا گیا۔ مقامی صحافی حلقوں نے اس افسوسناک واقعے پر گہرے دکھ اور افسوس کا اظہار کیا ہے۔