سٹی ہاؤسنگ سوسائٹی میرپور نے لوگوں کا جینا محال کر دیا

اسلام گڑھ پلجورہ ٹاؤن (رپورٹ) – سٹی ہاؤسنگ سوسائٹی میرپور کی انتظامیہ کی مبینہ غفلت اور خود غرض پالیسیوں نے مقامی رہائشیوں کی زندگی اجیرن بنا دی۔ حالیہ بارشوں میں سوسائٹی نے بارش کا سارا پانی رہائشی آبادی کی طرف موڑ دیا جس کے باعث پانی گھروں اور کمروں میں داخل ہو گیا، قیمتی سامان خراب اور مکین شدید پریشانی کا شکار ہیں۔

مقامی لوگوں کا کہنا ہے کہ ہاؤسنگ سوسائٹی زرعی اراضی کوڑیوں کے بھاؤ خرید کر غریب لوگوں سے ان کی زمینیں چھین رہی ہے جبکہ سوسائٹی کے نام پر شرفاء سے بھی پیسہ بٹورا جا رہا ہے۔ پہلے سے آباد علاقوں کے مکینوں کا کہنا ہے کہ ان کا جینا دوبھر کر دیا گیا ہے، بارش کا پانی رہائشی علاقوں کی طرف موڑ دینا انتظامیہ کی مجرمانہ غفلت کا واضح ثبوت ہے۔

شہری حلقوں نے ضلعی انتظامیہ اور آزاد کشمیر حکومت سے فوری نوٹس لینے کا مطالبہ کیا ہے تاکہ مقامی آبادی کو اس استحصال اور ماحولیاتی تباہی سے بچایا جا سکے۔