میرپور (نامہ نگار)
میرپور محکمہ پولیس کے ملازمین نے تنخواہوں میں اضافے کیلئے بھرپور احتجاج کیا، جس کی کال مکمل طور پر کامیاب رہی۔ پولیس ملازمین کی بڑی تعداد سڑکوں پر نکل آئی اور اپنے مطالبات کے حق میں شدید نعرے بازی کی۔
ذرائع کے مطابق بالا حکام کی جانب سے دی گئی تڑیاں اور دباؤ بھی پولیس اہلکاروں کو خاموش نہ کرا سکا۔ احتجاجی ملازمین نے واضح کیا کہ مہنگائی کے اس دور میں موجودہ تنخواہیں ناکافی ہیں اور جب تک تنخواہوں میں خاطر خواہ اضافہ نہیں کیا جاتا، ان کا احتجاج جاری رہے گا۔
ریاست بھر کے مختلف اضلاع میں بھی پولیس ملازمین اپنے حقوق کے حصول کیلئے سرگرم ہو گئے ہیں، جس سے حکومت پر دباؤ مزید بڑھ گیا ہے۔ مظاہرین نے کہا کہ “ہم عوام کی خدمت کرتے ہیں، لیکن اپنے ہی بچوں کو دو وقت کی روٹی دینے سے قاصر ہیں۔”
پولیس ملازمین نے حکومتی ایوانوں کو تنبیہ کی کہ اگر ان کے مطالبات تسلیم نہ کیے گئے تو آنے والے دنوں میں احتجاج کا دائرہ کار مزید وسیع کر دیا جائے گا۔
