راولپنڈی کے علاقہ جاتلی میں اجرت مانگنے پر مزدور قتل،مقدمہ درج

راولپنڈی (نمائندہ پنڈی پوسٹ) راولپنڈی کی تحصیل گوجرخان کے علاقہ جاتلی میں ظلم کی انتہا، 24 سالہ نوجوان حماد علی کو مبینہ طور پر مزدوری مانگنے پر بے دردی سے قتل کر دیا گیا۔ واقعے کا مقدمہ نمبر 220/25 مورخہ 4 مئی 2025 کو درج کیا گیا ہے۔تفصیلات کے مطابق، مقتول حماد علی کو محمد نظیر، عرفان لطیف، اور عاطف نظیر نامی افراد نے ڈیرہ مویشیاں پر کام کے لیے بلایا تھا۔ والد نائد احمد کے مطابق، فریقین کے درمیان 25 ہزار روپے تنخواہ، رہائش اور کھانے کا معاہدہ طے پایا تھا۔

مقتول نے کچھ روز قبل والد سے ملاقات میں بتایا تھا کہ اسے تنخواہ نہ دی جا رہی ہے بلکہ قتل کی دھمکیاں بھی دی جا رہی ہیں۔چار مئی کو مقتول کی لاش ملی، جسے گولیاں ماری گئی تھیں اور ایک پسٹل بھی لاش کے قریب رکھا گیا تھا تاکہ قتل کو خودکشی ظاہر کیا جا سکے۔

مقتول کے والد نے الزام عائد کیا ہے کہ اس کے بیٹے کو مزدوری مانگنے پر بے گناہ قتل کیا گیا ہے اور اس سانحے میں تین افراد براہ راست ملوث ہیں۔پولیس نے مقدمہ درج کر کے تفتیش کا آغاز کر دیا ہے، جب کہ مقتول کے لواحقین نے اعلیٰ حکام سے انصاف کی اپیل کی ہے اور مطالبہ کیا ہے کہ ملزمان کو فوری طور پر گرفتار کر کے قانون کے کٹہرے میں لایا جائے۔