راولپنڈی کی انتہائی مصروف اور مرکزی شاہراہ مری روڈ کو سرسبز،جدید اور خوبصورت بنا دیا گیا۔

راولپنڈی(اویس الحق سے)وزیراعلیٰ پنجاب مریم نواز شریف کی خصوصی ہدایت پر راولپنڈی کی مرکزی شاہراہ مری روڈ کو سرسبز، جدید اور خوبصورت بنا دیا گیا ہے۔

راولپنڈی کی تاریخی اور مصروف ترین سڑک کی ری ویمپنگ اور اَپ گریڈیشن کا عمل مکمل کر لیا گیا ہے، جس کے بعد مری روڈ اب ایک گرین کوریڈور کی شکل اختیار کر چکی ہے۔

ماضی میں بے ہنگم ٹریفک، ٹوٹ پھوٹ اور کچرے کے ڈھیروں سے بھرپور یہ سڑک اب پھولوں، درختوں، روشنیوں اور شہری سہولیات سے مزین ہو چکی ہے۔ سیکستھ روڈ پر پل کے نیچے نوجوانوں کے لیے ایک جدید اور خوبصورت ٹینس کورٹ تعمیر کیا گیا ہے جبکہ اسی مقام اور اس کے اردگرد راستوں کو دلکش پودوں، درختوں اور پھولوں سے سجا دیا گیا ہے۔

سیکستھ اور سیونتھ روڈ پر شہریوں کے لیے آرام دہ انتظار گاہیں بھی قائم کر دی گئی ہیں۔ چاندنی چوک میں واقع تاریخی کلاک ٹاور کی اَپ گریڈیشن مکمل کر لی گئی ہے، جو اب علاقے کی خوبصورتی میں مزید اضافہ کر رہا ہے۔

مری روڈ اور میٹرو روٹ کے دونوں اطراف خوبصورت پھولوں کی کیاریاں بنائی گئی ہیں، جبکہ میٹرو پل کے ستونوں کو بیلوں اور پھولوں سے ڈھانپ دیا گیا ہے۔ گردوغبار سے پاک یہ سڑک اب نہ صرف شہریوں کے لیے ایک خوشگوار حیرت کا باعث بن رہی ہے بلکہ ماحولیاتی بہتری کی جانب بھی ایک مثبت قدم ہے۔

رات کے وقت روشنیوں سے جگمگاتی مری روڈ ایک نیا منظر پیش کرتی ہے، جو راولپنڈی کے شہریوں اور مسافروں کے لیے دلکشی کا باعث بن رہی ہے۔

وزیراعلیٰ مریم نواز شریف نے اس منصوبے پر پی ایچ اے سمیت تمام متعلقہ اداروں کو شاباش دی اور کہا کہ راولپنڈی کے خوبصورت دل رکھنے والے شہریوں کو ایک خوبصورت، صاف اور سرسبز مری روڈ کا تحفہ دیا گیا ہے۔

ان کا کہنا تھا کہ ’’نواز شریف کے وژن کے تحت مری روڈ اور میٹرو جیسے منصوبے شروع کیے گئے، اب ان کی دیکھ بھال، صفائی اور خوبصورتی کو بھی یقینی بنایا جا رہا ہے۔‘‘

وزیراعلیٰ نے اہلیان راولپنڈی کو اس منصوبے کی تکمیل پر مبارکباد دیتے ہوئے کہا کہ وہ پنجاب کے ہر شہر کو جدید، صاف ستھرا، سرسبز اور مثالی سہولیات سے آراستہ بنا کر دم لیں گی۔