راولپنڈی ٹریفک پولیس کا 12 ربیع الاول کے لیے ٹریفک پلان جاری، 450 سے زائد اہلکار تعینات

راولپنڈی (سٹاف رپورٹر)  عید میلاد النبی ﷺ کے پرامن اور منظم انعقاد کو یقینی بنانے کے لیے راولپنڈی ٹریفک پولیس نے 12 ربیع الاول کے موقع پر خصوصی ٹریفک پلان جاری کر دیا ہے۔ ٹریفک پولیس کے مطابق، اس دن شہر بھر میں 455 سے زائد افسران و اہلکاران ڈیوٹی سرانجام دیں گے جن میں 07 ڈی ایس پیز اور 83 سینئر ٹریفک وارڈنز بھی شامل ہوں گے۔

ترجمان ٹریفک پولیس راولپنڈی کے مطابق، شہر میں دو مرکزی جلوس نکالے جائیں گے۔ ایک جلوس جامعہ مسجد حنفیہ، جامع مسجد روڈ سے برآمد ہو گا جبکہ دوسرا جلوس 22 نمبر چونگی سے شروع ہو گا۔

جامعہ مسجد جلوس کا روٹ:
یہ جلوس پل شاہ نذر، بنی چوک، مری روڈ، کمیٹی چوک، لیاقت روڈ، فوارہ چوک اور ڈنگی کھوئی سے گزرتے ہوئے جامع مسجد دائرہ میں اختتام پذیر ہو گا۔ جلوس کے گزرنے والے راستوں پر مرحلہ وار ڈائیورشن لگا کر ٹریفک کو عارضی طور پر بند کیا جائے گا۔

22 نمبر چونگی جلوس کا روٹ:
یہ جلوس ٹینچ روڈ، ڈھوک سیداں چوک، کلمہ چوک، آدڑہ روڈ، سٹیٹ لائف بلڈنگ، ایم ایچ چوک، محفوظ چوک، مانسہرہ اڈہ، تھانہ کینٹ، نشتر سٹریٹ، آدم جی روڈ، مٹھو خان احاطہ، ریلوے روڈ، کامران مارکیٹ سے ہوتا ہوا جی ٹی ایس چوک (پرانا واران اڈہ) پر اختتام پذیر ہو گا۔

متبادل راستوں کا اعلان:

• لیاقت باغ سے فوارہ چوک جانے والی ٹریفک کو ڈی اے وی کالج سے گوالمنڈی کی طرف موڑا جائے گا۔
• کلمہ چوک سے 22 نمبر کی طرف آنیوالی ٹریفک کو ہارلے سٹریٹ پر ڈائیورٹ کیا جائے گا۔
• جلوس مال روڈ پر پہنچنے کی صورت میں پشاور روڈ سے آنیوالی ٹریفک کو قاسم مارکیٹ سے شیر خان روڈ کی جانب موڑا جائے گا۔
• کچہری چوک سے پشاور روڈ جانے والی ٹریفک کو ٹی ایم چوک سے مری روڈ پر بھیجا جائے گا۔

پابندیاں اور حفاظتی اقدامات:
چیف ٹریفک آفیسر (سی ٹی او) راولپنڈی فرحان اسلم کے مطابق:

• جلوس کے دوران شہر میں ہیوی ٹریفک (ٹرالر، شہزور، ٹرک، ٹریکٹر ٹرالی وغیرہ) کے داخلے پر مکمل پابندی عائد ہو گی۔
• سٹیج سے 300 گز کے ایریا میں پارکنگ کی اجازت نہیں ہو گی۔
• ایمبولینس، فائر بریگیڈ اور دیگر ایمرجنسی گاڑیوں کے لیے علیحدہ خصوصی پلان ترتیب دیا گیا ہے۔
• ٹریفک کی روانی کو برقرار رکھنے کے لیے اضافی اہلکار متبادل راستوں پر تعینات کیے گئے ہیں۔

عوام سے اپیل:
سی ٹی او فرحان اسلم نے شہریوں سے اپیل کی ہے کہ ٹریفک قوانین کی پابندی کریں اور دوران جلوس ٹریفک پولیس سے تعاون کریں۔ کسی بھی پریشانی یا رہنمائی کے لیے شہری ٹریفک پولیس ہیلپ لائن 051-9274843 پر رابطہ کر سکتے ہیں۔