راولپنڈی:پولیو ورکرز کا احتجاج، پولیو مہم ناکام ہونے کا خدشہ

راولپنڈی (نمائندہ پنڈی پوسٹ)راولپنڈی کے مختلف علاقوں میں پولیو ورکرز نے حکومت پنجاب کی پالیسیوں کے خلاف احتجاجاً کام بند کر دیا ہے۔ ورکرز نے پولیو اور ڈینگی کی جاری مہم کا بائیکاٹ کرتے ہوئے سڑکوں پر احتجاجی مظاہرہ کیا۔مظاہرین کا کہنا ہے کہ محکمہ صحت کو نجی شعبے کے حوالے کیا جا رہا ہے، جس سے ہزاروں ورکرز کی ملازمتیں خطرے میں پڑ گئی ہیں۔ ورکرز نے شکوہ کیا کہ نہ صرف تنخواہیں تاخیر کا شکار ہیں، بلکہ انہیں کسی قسم کا مالی تحفظ یا گولڈن شیئر بھی فراہم نہیں کیا جا رہا۔

احتجاج میں شریک ایک خاتون ورکر کا کہنا تھا:”ہم گزشتہ دس سالوں سے گھر گھر جا کر بچوں کو پولیو کے قطرے پلا رہے ہیں، گرمی، سردی، بارش سب میں۔ آج ہماری نوکریاں غیر یقینی بن گئیں، اور حکومت ہمیں سننے کو بھی تیار نہیں۔”

ورکرز کے مطابق متعدد ساتھیوں کو بغیر کسی وجہ کے ملازمت سے فارغ کر دیا گیا ہے، جس نے ورکرز میں شدید بے چینی پھیلا دی ہے۔اس احتجاج کے باعث راولپنڈی میں جاری پولیو اور ڈینگی مہم فی الحال معطل ہو چکی ہے، جس سے شہر میں وباؤں کے دوبارہ پھیلنے کا خطرہ بڑھ گیا ہے۔

دوسری جانب، محکمہ صحت یا حکومتِ پنجاب کی جانب سے تاحال کوئی واضح موقف سامنے نہیں آ سکا، جس سے صورتحال مزید پیچیدہ ہو گئی ہے۔شہریوں نے حکومت سے مطالبہ کیا ہے کہ وہ ورکرز کے مسائل کو سنجیدگی سے لے اور فوری طور پر اس مسئلے کا حل نکالا جائے تاکہ عوامی صحت کے لیے جاری مہمات متاثر نہ ہوں۔