حلقہ کے عوام کے ساتھ ہمارا اٹوٹ انگ کا رشتہ ہے،عمار صدیق خان

ٹیکسلا(نمائندہ پنڈی پوسٹ)سابق ممبر پنجاب اسمبلی حلقہ پی پی 12 عمار خان نے کہا ہے کہ ہمارا حلقہ کے عوام کے ساتھ اٹوٹ انگ کا رشتہ ہے،میرے تایا جان سابق وفاقی وزیر غلام سرور خان، میرے والد سابق ایم پی اے محمد صدیق خان (مرحوم)، میرے چچا سابق ایم پی اے محمد شفیق خان کی حلقہ کے لئے خدمات کھلی کتاب کی مانند ہیں، میں اور میرا بھائی سابق ایم این اے منصور حیات خان نے بھی حلقہ میں تعمیروترقی اور خدمت کی سیاست کو فروغ دیا

حالات ایک جیسے ہمیشہ نہیں رہتے مگر رشتے قائم رہتے ہیں،یونین کونسل ٹھٹھ خلیل ہماری آبائی یونین کونسل ہے اور یہاں کے مکین ہمارے اپنے ہیں، ہماری عوام کے لئے خدمات کا تسلسل جاری رہے گا

ان خیالات کا اظہار انھوں نے یونین کونسل ٹھٹھہ خلیل محلہ شرقی سے اقبال ، نذیر،رفاقت ممبر، ملک مدثر، حنیف ٹھیکیدار اور محلہ غربی ٹھٹھہ خلیل میں ملک رحمت دین، ملک آصف، ملک ہارون کی جانب سے منعقدہ میٹنگ سے خطاب کرتے ہوئے کیا، تقریب میں ملک طلعت محمود، ملک فیصل، آفتاب شاہ، جنید خان، ملک حمزہ،ملک ناصرسمیت عمائدین علاقہ بھی موجود تھے،اہل علاقہ کی جانب سے مکمل حمایت اور سپورٹ کا اعلان کیا گیا،عمار صدیق خان نے مزید کہا کہ ہم نے ہمیشہ خدمت اور شرافت کی سیاست کو فروغ دیا ہے، اس حلقہ کے عوام ہمارا کل اثاثہ ہیں ان شاءاللہ بزرگوں دوستوں اور بھائیوں کے تعاون سے خدمت کا یہ سلسلہ اسی طرح چلتا رہے گا