تحصیل ہیڈکوارٹر ہسپتال کلرسیداں میں ہنگامہ آرائی, ن لیگی رہنما شیخ عظیم اکرم گرفتار

تحصیل ہیڈکوارٹر ہسپتال کلر سیداں کی میڈیکل سپرنٹنڈنٹ ڈاکٹر عابدہ پروین کی درخواست پر پولیس نے مسلم لیگ (ن) کے رہنما اور معروف کاروباری شخصیت شیخ عظیم اکرم کے خلاف کارروائی کرتے ہوئے مقدمہ درج کر لیا ہے۔

ڈاکٹر عابدہ پروین کا مؤقف ہے کہ شیخ عظیم اکرم ہسپتال کے دفتر میں داخل ہوئے اور مبینہ طور پر بدتمیزی کرتے ہوئے انہیں سنگین نتائج کی دھمکیاں دیں۔ اس اطلاع پر کلر سیداں پولیس نے مقدمہ نمبر 860/25 بجرم 506/186 تعزیراتِ پاکستان کے تحت تھانہ کلر سیداں میں مقدمہ درج کر کے شیخ عظیم اکرم کو گرفتار کر کے حوالات میں بند کر دیا۔

دوسری جانب، شیخ عظیم اکرم نے اپنے مؤقف میں کہا ہے کہ وہ صرف میڈیکل ویکسین کارڈ پر مہر لگوانے کے لیے ہسپتال گئے تھے، وہاں کسی قسم کی بدتمیزی یا دھمکی آمیز واقعہ پیش نہیں آیا۔ ان کا کہنا ہے کہ ان کے خلاف جھوٹی درخواست دی گئی ہے اور بے بنیاد ایف آئی آر درج کی گئی ہے، جس میں کسی قسم کی حقیقت نہیں۔