بلائنڈ آرچری چیمپئن شپ 2025 کا واہ کینٹ میں شاندار انعقاد۔

واہ کینٹ ۔ بصیرت ہائی اسکول فار انکلوسو ایجوکیشن واہ کینٹ اور واہ آرچر کلب کے اشتراک سے “بلائنڈ آرچری چیمپئن شپ 2025” کا کامیاب انعقاد ڈاکٹر سکندر حیات کرکٹ اسٹیڈیم، ریذیڈینشیا آرچرڈ اسکیم، ایم پی سی ایچ ایس واہ کینٹ میں کیا گیا۔ یہ منفرد ایونٹ بصارت سے محروم کھلاڑیوں کے لیے اپنی نوعیت کا ایک نمایاں اقدام تھا، جس کا مقصد ان کی صلاحیتوں کو اجاگر کرنا اور انہیں ایک پلیٹ فارم مہیا کرنا تھا۔

تقریب کے افتتاحی سیشن کے مہمان خصوصی مہر شاہد اقبال (چیف وارڈن آفیسر، سول ڈیفنس اسلام آباد) اور عون عباس (سی ای او چیپٹرز کو ورکنگ اسلام آباد) تھے، جنہوں نے کھلاڑیوں کے جوش و جذبے کو سراہتے ہوئے اس طرح کے ایونٹس کو وقت کی اہم ضرورت قرار دیا۔

اختتامی تقریب کی صدارت ایم این اے محترمہ آسیہ ناز تنولی نے کی، جبکہ مہمانِ اعزاز سیٹھ طیب (سی ای او حسن ابدال گروپ آف ٹریولز) تھے، جنہوں نے منتظمین کی کاوشوں کو سراہا اور کھلاڑیوں کی کارکردگی پر خوشی کا اظہار کیا۔ ایونٹ کے انعقاد میں پرنسپل بصیرت اسکول محترمہ جویریہ فیصل، عثمان، طیب اور سلمان (واہ آرچر کلب) نے کلیدی کردار ادا کیا۔ کوچ اعجاز چکوالوی (لاہور) اور خالد قیوم کیانی (واہ کینٹ) نے کھلاڑیوں کی تربیت کی ذمہ داری نبھائی، جبکہ ریفری و اسکورنگ کے فرائض طارق (راولپنڈی) اور اسامہ (اسلام آباد) نے انجام دیے۔

ایونٹ میں شریک حاضرین نے مقابلوں سے بھرپور لطف اٹھایا اور بصارت سے محروم کھلاڑیوں کی مہارت، عزم اور حوصلے پر بھرپور داد دی۔ اس کامیاب ایونٹ نے ثابت کیا کہ معذوری کسی کی صلاحیتوں کی راہ میں رکاوٹ نہیں، اور اگر مناسب مواقع فراہم کیے جائیں تو خصوصی افراد بھی ہر میدان میں اپنی صلاحیتوں کا لوہا منوا سکتے ہیں۔