ایم پی اے چوہدری نعیم اعجاز کی رہائش گاہ پر CCD کا چھاپہ، متعدد افراد گرفتار

راولپنڈی (حماد چوہدری) انتہائی باوثوق ذرائع کے مطابق کرائم کنٹرول ڈپارٹمنٹ (CCD) نے پاکستان تحریکِ انصاف کے رکنِ صوبائی اسمبلی (ایم پی اے) پی پی 10، چوہدری نعیم اعجاز کی رہائش گاہ پر چھاپہ مارا، جس کے دوران تین افراد کو حراست میں لیا گیا۔ اسی کارروائی کے تسلسل میں سات سے آٹھ افراد کو بلیو ورلڈ سٹی سے بھی حراست میں لیے جانے کی اطلاعات موصول ہوئی ہیں۔اس واقعے کے حوالے سے چوہدری نعیم اعجاز کا موقف جاننے کے لیے ان سے متعدد بار رابطے کی کوشش کی گئی، تاہم انہوں نے کال موصول نہیں کی۔ بعد ازاں، اپنے جاری کردہ مختصر بیان میں انہوں نے الزام عائد کیا کہ CCD نے بغیر کسی قانونی وارنٹ کے ان کی رہائش گاہ پر کارروائی کی، گھر میں توڑ پھوڑ کی گئی، اور اہل خانہ کو ہراساں کیا گیا۔چوہدری نعیم اعجاز کے مطابق، یہ واقعہ اعلیٰ پولیس و حکومتی افسران کے نوٹس میں لایا گیا ہے اور اس حوالے سے جلد قانونی چارہ جوئی بھی متوقع ہے۔تاحال CCD یا دیگر متعلقہ اداروں کی جانب سے کوئی باضابطہ موقف سامنے نہیں آیا