اسلام آباد (نمائندہ خصوصی) وفاقی دارالحکومت اسلام آباد اور جڑواں شہر راولپنڈی کے درمیان جدید اور تیز رفتار ریل سروس کے آغاز کا اہم فیصلہ کر لیا گیا۔ اس منصوبے کی تکمیل سے شہری صرف 20 منٹ میں دونوں شہروں کے درمیان سفر کر سکیں گے، جس سے وقت، ایندھن کی بچت اور ٹریفک کے دباؤ میں نمایاں کمی آئے گی۔
یہ فیصلہ وزیر داخلہ محسن نقوی اور وفاقی وزیر ریلوے حنیف عباسی کی زیر صدارت ایک اہم اجلاس میں کیا گیا، جس میں وزیر مملکت برائے داخلہ طلال چوہدری سمیت اعلیٰ حکام نے شرکت کی۔ اجلاس میں فیصلہ کیا گیا کہ مارگلہ اسٹیشن اسلام آباد سے راولپنڈی صدر اسٹیشن تک ریل منصوبے کو جلد از جلد مکمل کیا جائے گا۔
اجلاس میں یہ بھی طے پایا کہ:
- ریل ٹریک وزارتِ ریلوے فراہم کرے گی۔
- ریل سروس کا انتظام کیپٹل ڈیولپمنٹ اتھارٹی (CDA) سنبھالے گی۔
- سروس کے لیے جدید ٹرینیں بیرونِ ملک سے درآمد کی جائیں گی۔
- آئندہ ہفتے منصوبے کے فریم ورک ایگریمنٹ کو حتمی شکل دے کر دستخط کیے جائیں گے۔
وفاقی وزیر ریلوے حنیف عباسی نے کہا کہ جڑواں شہروں کے درمیان یہ سروس عوامی فلاح کا بہترین منصوبہ ثابت ہوگی اور شہریوں کو تیز، آرام دہ اور سستی سفری سہولت میسر آئے گی۔
وزیر داخلہ محسن نقوی نے کہا کہ یہ منصوبہ وزیراعظم شہباز شریف کے عوامی ریلیف کے ویژن کا عکاس ہے، جس سے ہزاروں شہری جدید سفری سہولت سے مستفید ہوں گے۔
وزیر مملکت طلال چوہدری نے کہا کہ ٹرین سروس نہ صرف کم خرچ اور تیز رفتار ہوگی بلکہ اس سے سڑکوں پر ٹریفک کا دباؤ بھی نمایاں حد تک کم ہو جائے گا۔
اجلاس میں وفاقی سیکریٹری داخلہ، سیکریٹری ریلوے، چیئرمین سی ڈی اے، کمشنر راولپنڈی، آئی جی اسلام آباد، ڈپٹی کمشنر اسلام آباد، ایف سی کمانڈنٹ، اور دیگر اعلیٰ حکام نے شرکت کی
