آئندہ چند گھنٹوں میں خطہ پوٹھوہار میں بارش کا امکان

راولپنڈی (نمائندہ پنڈی پوسٹ) آج رات (پیر) اور کل صبح (منگل) سے جمعہ اور ہفتہ تک ایک طاقتور مغربی ہواؤں کا سلسلہ ملک کے بالائی اور وسطی علاقوں پر اثر انداز ہونے کے قوی امکانات رکھتا ہے۔

اس سسٹم کے زیرِ اثر گلگت بلتستان، آزاد کشمیر، بالائی خیبر پختونخوا، شمالی پنجاب، پوٹھوہار ریجن (راولپنڈی، اسلام آباد، مری، ایبٹ آباد، مظفرآباد، کوٹلی، راولا کوٹ، نیلم ویلی، جہلم ویلی، دینہ، میرپور)، سرگودھا ڈویژن، چکوال اور اردگرد کے علاقوں میں تیز ہواؤں، گرج چمک کے ساتھ بارش اور بعض مقامات پر ژالہ باری جبکہ بلند پہاڑی علاقوں پر برفباری کا امکان ہے۔

جنوبی اور وسطی پنجاب (جن میں لاہور، فیصل آباد، ملتان، بھکر، میانوالی، لیہ، خانیوال، ساہیوال، جھنگ، سرگودھا) میں بھی بعض مقامات پر گرج چمک کے ساتھ بارش، تیز ہوائیں اور ژالہ باری متوقع ہے۔

یہ موسمی صورتحال کسان حضرات کے لیے بھی اہم ہے، خاص طور پر گندم کی کٹائی کے مرحلے میں، لہٰذا احتیاطی تدابیر اختیار کریں۔

یہ پیشگوئی جدید ریڈار ڈیٹا، سیٹلائٹ امیجز اور ذاتی مشاہدے کی بنیاد پر دی گئی ہے، جو حتمی نہیں لیکن کافی حد تک درست ہو سکتی ہے