کلرسیداں (پنڈی پوسٹ نیوز)کلر سیداں پولیس کا غیر قانونی مقیم افغان باشندوں کے خلاف بڑا کریک ڈاؤن، 80 گرفتار۔ تھانہ کلر سیداں پولیس نے ایک بڑے کریک ڈاؤن کے دوران کلر سیداں اور اس کے نواحی علاقوں میں مقیم تقریباً 80 غیر قانونی افغان باشندوں کو گرفتار کر لیا ہے، جنہیں بعد ازاں رفیوجی کیمپ راولپنڈی منتقل کر دیا گیا۔
تفصیلات کے مطابق ایس ایچ او تھانہ کلر سیداں، سب انسپکٹر سید سبطین الحسین نے بتایا کہ یہ کارروائی چوآ خالصہ، سہوٹ اور کلر سیداں کے مختلف علاقوں میں کی گئی۔ آپریشن کے دوران پولیس نے اُن افراد کو حراست میں لیا جو پاکستانی پاسپورٹ یا کسی بھی قانونی سفری دستاویزات کے بغیر پاکستان میں مقیم تھے۔
گرفتار ہونے والوں میں 11 خواتین بھی شامل ہیں، جو دیگر مرد افراد کے ہمراہ غیر قانونی طور پر یہاں رہائش پذیر تھیں۔ پولیس ذرائع کے مطابق یہ تمام افراد کسی بھی قانونی رجسٹریشن کے بغیر یہاں مقیم تھے، جس پر ان کے خلاف قانونی کارروائی کرتے ہوئے انہیں رفیوجی کیمپ بھجوا دیا گیا۔پولیس کا کہنا ہے کہ غیر قانونی تارکینِ وطن کے خلاف کارروائی قانون نافذ کرنے والے اداروں کی ہدایات پر عمل درآمد کا حصہ ہے، اور یہ سلسلہ آئندہ بھی جاری رہے گا۔
عوام سے اپیل کی گئی ہے کہ وہ مشتبہ افراد کی موجودگی کی اطلاع فوری طور پر پولیس کو دیں تاکہ قانون کی عمل داری کو یقینی بنایا جا سکے۔ذرائع کے مطابق پولیس دیگر علاقوں میں بھی اسی نوعیت کی کارروائیاں جاری رکھنے کا ارادہ رکھتی ہے تاکہ کسی بھی غیر قانونی سرگرمی کا بروقت سدباب کیا جا سکے۔
