راولپنڈی(نمائندہ پنڈی پوسٹ) پنجاب کی سرزمین فن وثقافت کی امین ہے جہاں ثقافت ہمیشہ پروان چڑھی ہے۔ پنجاب میں پنجابی،سرائیکی،پوٹھوہاری اور بلوچی ثقافت کے رنگ نمایا ں ہیں، وزیر اعلی پنجاب کی کاوشوں سے ٹیلنٹ ہنٹ پروگرام 2022 فن وثقافت کے فروغ کے لیے ایک اہم قدم ہے۔ ان خیالات کا اظہارپرنسپل پوسٹ گریجویٹ کالج اٹک پروفیسر ماجد وحیدبھٹی نے پنجاب ٹیلنٹ ہنٹ کے ضلعی سطع کے مقابلوں کے پہلے مرحلے کے انعقادکے موقع پرکیا۔ پہلے مرحلے میں گائیکی، مصوری اور مختصر کہانی نویسی کے مقابلے میں نوجوانوں کی کثیرتعدادنے حصہ لیا۔ ڈائریکٹر پنجاب آرٹس کونسل راولپنڈی وقار احمدنے کہا کہ پنجاب ٹیلنٹ اپنی نوعیت کا ایک منفرد پروگرام ہے جو پنجاب کا بلخصوص اور پاکستان کا سوفٹ امیج دنیا کے سامنے لیکر آرہا ہے۔ انھوں نے کہا کہ ٹیلنٹ ہنٹ پروگرام کا مقصد نوجوانوں کی حوصلہ افزائی ہے کیونکہ پاکستان کا مستقبل انہی نوجوانوں سے جڑا ہے۔ گورنمنٹ پوسٹ گریجویٹ کالج اٹک میں ہونے والے مقابلوں میں ہابل، رابن گلزار اور محمد عثمان نے گائیکی کے مقابلوں میں پہلی، دوسری اور تیسری پوزیشن حاصل کی۔ مصوری کے مقابلوں میں مقدس نذیر پہلے نمبرپر جبکہ اُم سلمی نے دوسری اور شمسہ کنول نے تیسری پوزیشن حاصل کی۔ مختصر کہانی نویسی کے مقابلوں میں نعمان یونس پہلے انعام کے حق دار قرار پائے، جبکہ عظمی پروین نے دوسرے اور عبد الرفع تیسرے نمبر پر رہے۔ پوزیشن حاصل کرنے والے بچوں میں انعامات اور تعریفی اسناد تقسیم کی گئیں۔
142