سابق وزیراعظم اور چیئرمین پی ٹی آئی عمران خان نے حکومت کو پہلا بڑا سرپرائز دے دیا جس کے مطابق 26 نومبر کو راولپنڈی میں جلسے کے ساتھ ساتھ دھرنا بھی دیا جائے گا۔پی ٹی آئی اجلاس کے اندرونی ذرائع نے بتایا ہے کہ عمران خان 26 نومبر کو اپنے خطاب میں حکومت کو چارٹر آف ڈیمانڈ دیں گے، چارٹر آف ڈیمانڈ میں فوری طور پر قبل از وقت شفاف انتخابات کا اعلان بھی شامل ہے۔ذرائع نے بتایا کہ حکومت اگر قبل از وقت انتخابات کا اعلان کرتی ہے تو تحریک انصاف انتخابی اصلاحات کے حوالے سے قانون سازی میں تعاون کی پیشکش کرے گی۔ذرائع نے مزید بتایا کہ عمران خان حکومت کو مطالبات کی منظوری کے لیے مختصر وقت دیں گے جو 2 سے 3 دن تک ہوسکتا ہے اور اگر حکومت مطالبات منظور نہیں کرتی تو دھرنا طوالت اختیار کرے گا۔پاکستان تحریک انصاف نے مشاورتی اجلاس میں پارٹی رہنماؤں کو راولپنڈی میں ایک ہفتے تک کے قیام کے بندوبست کی ہدایت کردی۔راولپنڈی علامہ اقبال پارک میں ابتدائی طور پر تقریباً 30 ہزار افراد کے لیے خیمہ بستی قائم کی جائے گی ، راولپنڈی پہنچنے کے بعد تحریک انصاف کے چیئرمین عمران خان حکومت کو مذید سرپرائز بھی دیں گے۔ذرائع کا کہنا ہے کہ سابق وزیراعظم اور چیئرمین پی ٹی آئی عمران خان پر قاتلانہ حملے کی غیر جانبدارانہ تحقیقاتی کمیشن اور ایف آئی آر کا اندراج بھی چارٹر آف ڈیمانڈ میں شامل ہے۔
113
