جہلم(نمائندہ پنڈی پوسٹ)جہلم شہر کی سڑکیں بازار تجاوزات مافیا کے نرغے میں، بااثر دکانداروں نے فٹ پاتھوں پر دکانیں سجا لیں، شہریوں کا پیدل چلنا محال، شہریوں نے ایڈمنسٹریٹر میونسپل کمیٹی /ایڈیشنل ڈپٹی کمشنر ریونیو سے نوٹس لینے کا مطالبہ کر دیا، تفصیلات کے مطابق بااثر تجاوزات مافیا نے شہر کی سڑکوں فٹ پاتھوں پر دکانیں سجا کر پیدل چلنے والوں کے لئے مشکلات پیدا کر دی ہیں، میونسپل کمیٹی کے شعبہ انکروچمنٹ کی سرپرستی میں جہاں شہر کے بازاروں میں تجاوزات کی بھرمار ہے وہیں پر ریلوے روڈ، تحصیل روڈ، سول لائن روڈکے ساتھ ساتھ اولڈ جی ٹی روڈ پر موجودفٹ پاتھ بھی تجاوزات مافیا سے نہیں بچ سکے، بلدیاتی نمائندوں کی فراغت کے بعد شہریوں نے اپنی امیدیں ایڈمنسٹریٹر میونسپل کمیٹی سے وابستہ کررکھی تھیں مگر موجودہ صورتحال میں شہریوں کو سخت مایوسی کا سامنا کرنا پڑ رہاہے، شہریوں کا اس حوالے سے کہنا ہے کہ خریداری کے لئے آنے والی خواتین، بزرگ، بچوں کو پیدل چلنے میں خاصی مشکلات کا سامنا کرنا پڑرہا ہے، دکانداروں نے فٹ پاتھوں پر دکانیں سجا کر پیدل چلنے والوں کے لئے رکاوٹیں قائم کر رکھی ہیں جس سے شہری مجبوراً سڑکوں پر سے گزررہے ہیں، اس حوالے سے ضلعی انتظامیہ، ایڈمنسٹریٹر میونسپل کمیٹی / ایڈیشنل ڈپٹی کمشنرریونیو نے شہریوں کے مسائل سے مکمل لا تعلقی اختیار کر رکھی ہے، شہریوں نے ارباب اختیار سے مطالبہ کیا ہے کہ تجاوزات مافیا کے خلاف گرینڈ آپریشن کرکے پیدل چلنے والوں کے لئے فٹ پاتھ واگزار کروائے جائیں تاکہ شہری باآسانی بازاروں سے خریداری کر سکیں۔
118
