راولپنڈی (نمائندہ پنڈی پوسٹ)راولپنڈی ڈویلپمنٹ اتھارٹی کا غیر قانونی ہاؤسنگ سکیموں اور غیر مجاز تعمیرات کے خلاف آپریشن زوروں پر جاری ہے تاکہ ہاؤسنگ پراجیکٹس کی غیر قانونی ڈویلپمنٹ کو کنٹرول کیا جا سکے۔آر ڈی اے کے ترجمان نے بتایا کہا ڈائریکٹر جنرل راولپنڈی ڈویلپمنٹ اتھارٹی محمد سیف انور جپہ کی ہدایت پر میٹرو پولیٹن پلاننگ اینڈ ٹریفک انجینئرنگ ڈائریکٹوریٹ آر ڈی اے کے عملے نے متعلقہ تھانے کی پولیس کے تعاون سے موضع ٹھٹھہ گورکھپورروڈ پر کیپٹل فلورا ویلی اور موضع ترہیہ گورکھپور روڈ راولپنڈی میں تین غیر قانونی نجی ہاؤسنگ سکیموں کے بکنگ دفاتر کو مسمار کر دیا ہے۔ انہوں نے کہا کہ ان غیر قانونی ہاؤسنگ سکیموں کے مالکان پنجاب پرائیویٹ ہاؤسنگ سکیم رولز 2021 کی خلاف ورزی کرتے ہوئے سکیموں کی منظوری کے بغیر بکنگ آفس چلا رہے تھے۔انہوں نے کہا کہ ڈی جی آر ڈی اے کی ہدایت پر پلاننگ ونگ آر ڈی اے غیر قانونی ہاؤسنگ سکیموں کی غیر قانونی اشتہارات اور مارکیٹنگ کے خلاف قانونی کارروائی کر رہا ہے۔ اتھارٹی نے مذکورہ ہاؤسنگ سکیموں کے مالکان کو بھی نوٹس جاری کر دیے ہیں۔ ان تینوں غیر قانونی ہاؤسنگ سکیموں کے خلاف فرسٹ انفارمیشن رپورٹس (ایف آئی آر) بھی درج کرا دی گئی ہیں۔انہوں نے کہا کہ ان غیر قانونی ہاؤسنگ سکیموں کے مالکان اور سپانسرز اشتہارات کے ذریعے عوام کو گمراہ کر رہے ہیں۔ انہوں نے کہا کہ اس سلسلے میں آر ڈی اے کے پلاننگ ونگ نے ایف آئی اے کے سائبر کرائم ونگ سے بھی درخواست کی ہے کہ وہ غیر قانونی ہاؤسنگ سکیموں کے غیر قانونی اور گمراہ کن اشتہارات کے خلاف قانونی کارروائی کریں تاکہ عوام کو غیر منظور شدہ رہائشی منصوبوں میں سرمایہ کاری سے روکا جا سکے۔انہوں نے کہا کہ ڈی جی آر ڈی اے محمد سیف انور جپہ نے معزز عوام الناس سے درخواست اور مشورہ دیا ہے کہ وہ غیر قانونی اور غیر مجاز ہاؤسنگ سکیموں میں کسی بھی قسم کی سرمایہ کاری کرنے میں محتاط رہیں۔ انہوں نے مزید کہا کہ عوام الناس سے بھی درخواست کی جاتی ہے کہ وہ کسی بھی ہاؤسنگ سکیم میں سرمایہ کاری کرنے سے پہلے آر ڈی اے سے چیک کر لیں، انہوں نے مزید کہا کہ آر ڈی اے کی ویب سائٹ rda.gop.pk پر بھی چیک کیا جا سکتا ہے
127
