مندرہ (ساجد نقوی) تھانہ مندرہ کے علاقے سکھو کے قریب ایک بڑی ڈکیتی کی واردات ہوئی ہے۔ اطلاعات کے مطابق، پیلے رنگ کی ریوالونگ لائٹ لگی سفید کار میں سوار ملزمان نے روڈ بیریئر لگا کر جانوروں کی اوجری سے گزرنے والے ایک لوڈڈ کارگو کنٹینر کو روکا۔
ملزمان نے ڈرائیور اور کنڈکٹر کو آنکھوں پر پٹی باندھ کر نامعلوم مقام پر منتقل کیا۔واقعے کے دوران ملزمان نے کارگو کنٹینر سے 70 بوری سامان اتار کر پوٹھی بجنیال روڈ، پاکستان کشمیر ٹاؤن کے قریب منتقل کیا۔
بعد ازاں، ملزمان نے چک دولت کے قریب روڈ کنارے کنٹینر کو کھڑا کر دیا۔ اوجری کے کاروبار سے وابستہ تاجر خان احمد خان کے مطابق، ملزمان نے ڈرائیور اور کنڈکٹر کو چونترہ کے علاقے کبھہ موڑ کے قریب چھوڑ دیا۔
کارگو کنٹینر کو چک دولت کے قریب کھڑا پایا گیا جس سے 680 بوری سامان برآمد ہوا۔ متاثرہ تاجر نے پولیس کو درخواست دیتے ہوئے ملزمان کا سراغ لگانے اور مسروقہ سامان کی برآمدگی کا مطالبہ کیا ہے۔
مقامی افراد نے اس واقعے پر تشویش کا اظہار کرتے ہوئے علاقے میں سیکیورٹی کے انتظامات بہتر بنانے کی اپیل کی ہے۔واضح رہے کہ یہ علاقہ پہلے بھی ایسے واقعات کی زد میں رہا ہے، مقامی شہری سیکیورٹی کے مسائل پر پریشان ہیں۔ پولیس نے عوام کو یقین دلایا ہے کہ ملزمان کو جلد از جلد گرفتار کر لیا جائے گا اور انصاف کا عمل تیز کیا جائے گا۔
